سميح تحفة ...ولو بالصدفة



سميح تحفة .. ولو بالصدفة
=======================

مايكل : ماحدش يقول كاني ولا ماني ... سميح ده .. انا حطيته في دماغي
ناجي : بصراحه عندك حق .. عمال يعمل فينا مقالب للصبح
وهيب : انتوا عارفين انه طلب مني ٣٠٠ جنيه سلف الاسبوع اللي فات .. حيرجعها لي
الاحد الجاي بس انا مارضيتش .. قال لي حيطلب منكم وانا قلت له مش حيدوك ..
قالي صدقني انا حاخد منكم انتوا الثلاثه ال ٣٠٠ جنيه
مايكل : ايه ده ؟ هو طلب منك انت كمان ده طلب مني برضه ٣٠٠ جنيه الاسبوع اللي
فات .. وقلت له وقالي نفس الكلام
ناجي : ايه ده ؟ ده طلب مني انا كمان وقال لي فعلاً حيرجعهالي الاحد الجاي .. .. لما
يفك الوديعه من البنك .. بس بصراحه برغم اني عارف انه حيرجع لي الفلوس
مارضيتش اسلفه عشان المقالب بتاعته دي .. قال لي عليكم فقلت له نفس الكلام
مايكل : ايه الثقه اللي هو فيها دي ؟ !! طب واحنا حنسكت ؟ لازم نعمل فيه كام مقلب
كده من بتوعه .. ايه رأيكم متفقين ؟
وهيب : متفقين .. ايه رأيك يا ناجي ؟
ناجي : انا ماعنديش مانع ... تعالوا نقول له ... ( يتهامسون فيما بينهم )
سميح : ازيكم ياجماعه
مايكل : باسم الصليب .. انت جيت ازاي ؟
ناجي : ايوه صحيح احنا ماشفناآش وانت جاي .. انت جيت منين ؟
سميح : جيت من هنا قدامكم .. بس يظهر انكم آنتم مشغولين قوي في الكلام
وهيب : اهلا ياسي سميح
سميح : اهلا بيكم انتم .. آنتم فين الاسبوع اللي فات مش باينين يعني ؟
مايكل ( يغمز لاصحابه ) : الحقيقه انا كنت في امريكا باطمئن علي صحة قداسة البابا
سميح: ايه ده معقوله ؟!!! برافو يامايكل .. انا ماعرفش انك سافرت !!
ناجي : ياه معقوله ياسميح ماتعرفش ان مايكل سافر امريكا .. يبقي اكيد معرفتش ان
انا سافرت اسبانيا اتفرج علي ماتش ريال مدريد وبرشلونه
سميح : ايه ده معقوله ياناجي ؟!!
وهيب : طبعاً معقوله .. يبقي اكيد كمان ماعرفتش اني انا سافرت بريطانيا عشان
اتفرج علي عملية صيانة ساعة بيج بن
سميح : ياه برافو عليكم .. انا كمان سافرت برضه ايطاليا
اتفرج علي مصانع المكرونه اللي هناك
مايكل : يابني بطل كذب .. ايطاليا ايه اللي سافرتها !! اذا كنت آنت بتقول اننا ماكناش باينين
.. عرفت ازاي وانت في ايطاليا ؟!!
ناجي : بطل بقي مقالبك دي مابقتش تخيل علينا
وهيب: انت ماسافرتش حته ياشاطر .. انت كنت هنا في الوقت اللي احنا سافرنا فيه
امريكا واسبانيا وبريطانيا
سميح : بصراحه انا فعلاً ماسافرتش ايطاليا .. انا سافرت راس البر .. بس اتكسفت
اقولكم اني رحت راس البر .. في الوقت اللي انتوا رحتوا فيه البلاد الحلوه دي .. بس انا
اتكسف ليه ؟!! انا سافرت في خدمه ودي حاجه ماتزعلش ولا تكسف
مايكل : خدمة ايه ان شاء الله ؟
سميح : انا سافرت مندوب عن الكنيسه .. عشان احجز مصيف راس البر للكنيسه
الصيف اللي جاي .. وفعلاً حجزت مكان حلو قوي وبسعر خيالي .. لدرجة ان الاماكن
في الرحله دي اتملت من دلوقتي .. مش فاضل غير اربع اماكن بس
ناجي : وانت مال وشك متسلخ آده ليه ؟
سميح : اصل بصراحه استغليت الفرصه ونزلت الميه هناك .. قد ايه الميه في المكان
ده جميله .. حتبقي رحله منعشه ولا في الخيال


وهيب : وبكام الاشتراك ؟
سميح : الفرد ١٠٠ جنيه شامل السفر والمبيت والاكل كمان ..
مايكل : ده سعر خيالي .. ممكن نبقي نطلع .. نبقي نفكر في الموضوع ده
سميح : تفكروا ايه !! باقولك الاماكن بتتخطف .. الحقوا احجزوا فاضل اربع اماكن بس
رشدي : ازيكم ياجماعه .. سميح انت فين انا قالب الدنيا عليك .. استاذ ثروت قالي
الحجز معاك .. لسه فيه اماكن في المصيف ؟
سميح : ايوه يارشدي ... لسه فيه اربع اماكن
رشدي : جميل .. احجز لي مكان ... وادي ١٠٠ جنيه .. دي رحله ولا في الخيال ..سلام
ياجماعه
سميح : سلام يارشدي .. وماتنساش الخمس حاجات اللي قلتهالك .. كده يبقي فاضل
٣ اماكن للي يحجز
مايكل : خمس حاجات ايه ؟
سميح : لا .. ده موضوع بيني وبين رشدي
مايكل : اه ... ايه رأيكم ياجماعه .. نحجز ونطلع مع بعض ؟
ناجي : فكره حلوه .. خد ياسميح ادي ١٠٠ جنيه بتاعتي واحجز لي
وهيب : وانا كمان خد ١٠٠ جنيه بتاعتي واحجز لي
مايكل : وانا كمان حادفع اهو .. قولي هي الاوضه بتساع كام فرد ؟
سميح : بتساع اربعه .. عن اذنكم بقي لما الحق اسلم الكشف والفلوس لاستاذ ثروت
.. سلام
مايكل : هاهاها ... اخيراً عملنا فيه مقلب وخليناه يصدق اننا سافرنا بره مصر بالرغم من
اننا مااتحركناش من مكاننا
ناجي : احسن عشان يبقي مقلب نعايره بيه من حين لاخر
وهيب : عاوزين في المصيف ده ننزل في اوضه واحده
احنا الثلاثه
مايكل : اكيد طبعاً .. بس نجيب مين الرابع بتاعنا ؟
ناجي : ايه رأيكم في رشدي ؟!! ولد طيب
وهيب : عندك حق نندهه وناخد رأيه .. رشدي
يارشدي
رشدي : خير ياجماعه ؟!!
مايكل : ايه رأيك تبقي الرابع بتاعنا في الاوضه في
المصيف اللي جاي ؟!!
رشدي : مصيف ايه ؟!!
ناجي : مصيف راس البر .. بتاع الصيف الجاي .. اللي
انت لسه حاجز مكان ليك مع سميح من شويه ..
ودفعت له اشتراآك ١٠٠ جنيه !!
رشدي: اولاً مافيش مصيف لراس البر الصيف اللي
جاي .. ثانياً حتي لو فيه مصيف معقوله يتحجز من دلوقتي
وهيب : امال ايه اللي حصل من شويه ده قدامنا .. ووش سميح اللي متسلخ ده ؟
رشدي : ماهو ده ثالثاً : وش سميح متسلخ عشان امبارح نزل البيسين بتاع النادي من
الصبح لغاية الليل .. رابعاً : سميح سمعكم وانتوا بتتفقوا عليه في موضوع السفريات
بتاعكم ده .. فقالي تعالي نضحك شويه مع اصحابنا .. واداني ١٠٠ جنيه وقالي ادفعها
قدامكم واقول واعمل اللي شفتوه ده
مايكل : يانهاره ابيض ... طب والفلوس اللي خدها منا ؟!!!
رشدي : ماهي دي خامس حاجه قالهالي سميح : هو قال ل ي انه حيضحك عليكم
وحياخد منكم ٣٠٠ جنيه.. وحيرجعها لكم الاحد الجاي زي ماقالكم قبل كده

شديدة قوى
برافو يا تاسونى
يا جماعة حد يقولي مين اللي بيألف قصص سميح دي عشان التاسوني عاملة تكتيم اعلامي تام عن المصدر!!!!! مين يا تاسوني الي بيألف القصص دي




يابنى ده سر المهنة بقالك سنتين عاوز تعرف ومش هقول لك حقوق السر محفوظة

تدفعى كام يا تاسونى و انا ماقولشى

اتصدقى كنت مستنياكى تقولى كده علشان انا عارفة انك عارفة... بس انا عارفة انك مش هتقولى الا لما بطوط يدفع لنا احنا الاتنين وانا لن اقبل باقل من انه يدخل المنتدى كل يوم لمدة سنة وكل يوم نلاقى منه على الاقل مشاركة واحدة والا انت ايه رايك خاصة ان بطوط من اصحاب المشاركات الرائعة وهو حرمنا من تواجده معنا فى المنتدى وان كنت كل اسبوع والتانى بكلمه على الماسنجر بس احنا عاوزينه معانا فى المنتدى

احرجتوني يا جماعة بس صدقوني اللي بيمنعني الشديد القوي `14` صلولي `17`
اما بالنسبة للمؤامرة اللي عاملينها عليا التاسوني وايفرست فانا مش هسمح بيها ابداااااااااااااااااااااااااااااا ولازم اعرف مصدر سميح دا ايه بليز يا ايفرست انا عاوز اعرف سميح دا اصله ايه انا مش عاوز التاسوني تفرح فيا اكتر من كدة `14`

مــــش حــــ `10` ـاقــــول إلا لما تاسونى تقوللى





مـــــــــــــــــــــــــــــــــاتقــــــــــــــــــولـــــــــــــــــــــــــــــــــــــــيش

الا لما ينفذ الدفع يعنى يدخل سنة بحالها ويعمل مشاركات حالة ابتزاز عينى عينك

يا جماعة انا موافق بس الواحد يدخل المنتدى عشان هو بيحب كدة مش عشان مضطر `14` ( بهزر طبعا) طيب خليني اعكس الموضوع يعني لو قلتلولي مين هو سميح واصله وفصله ايه وجاي منين ومين الللي بيألف حكاياته هدخل المنتدى كل يوم لمدة الفين سنة يالا انشله ماحد حوش ..... ولن انسى لكي هذا الموقف يا ايفرست ابدااااااااااااااااااااااااااااااااااااا


هو انت مقدرتش على التاسونى هتتشطر على ايفرست مالها ايفوست البنت بتنفذ وصية ابن الطاعة تحل عليه البركة وانت عاوزها لاتطيع كده مش حلو خالص

وبعدين حكاية انك تدخل المنتدى علشان بتحبه مش بالعافية مين قال كده احنا هنا مافيش حاجة اسمها بمزاجك دكتاتورية يعنى

اما قلب الاتفاق اننا نقول الاول وبعدين تدخل ان شالله الف سنة على مين يابنى الحركات ديه احنا كنا بنعملها زمان بس ربنا تاب علينا خلاص


`14`


خلى بالك لو مادخلتش يوم هنبتدى عد من الاول
تعيش و تاخد غيرها

بس الصراحة بتحط نفسك فى مواقف بايخة اويييييييييييييييييييييي

`14` `14`


اقول لك حاجة انا عارفة سميح ده بييجى منين انا وويتا الظاهر هنعمل عليك رباطية و عصابة القناع الاسود او مافيا بجد يا عينى عليك يا بطوط بس انا خايفة على المنتدى منك لان انفلوانزا الطيور شغالة يا بطوط

ليست هناك تعليقات:

إرسال تعليق

ملحوظة: يمكن لأعضاء المدونة فقط إرسال تعليق.

أحدث الموضوعات

From Coptic Books

إجمالي مرات مشاهدة الصفحة من 10/2010